Laharana 205 amin’ny Katesizy

Nantsoin’Andriamanitra i Môizy avy eo afovoan’ny kirihitra nirehitra nefa tsy levona. Hoy Andriamanitra taminy : “Izaho no Andriamanitry ny rainao, Andriamanitr’i Abrahama, Andriamanitr’i Isaaka ary Andriamanitr’i Jakôba” (Eks 3,6). Andriamanitra dia Andriamanitr’ireo razambe, Izy no niantso sy nitari-dalana ny patriarka tao anatin’ny fivezivezen’izy ireo. Izy no ilay Andriamanitra tsy mivadika sy mangoraka, izay mahatsiaro azy ireo sy ny fampanantenany ; tonga Izy mba hanafaka amin’ny fanandevozana ny taranak’izy ireo. Izy no Ilay Andriamanitra tsy voafehin’ny elanelana sy ny fotoana, ka mahavita izay ataony sy izay tiany, sy hampiasa ny Fahefany tsy manam-petra ho fahatanterahan’io fandaharana io.

Hoy i Môizy tamin’Andriamanitra : “Izao àry, ho any amin’ny zanak’i Israely aho, ka hilaza amin’izy ireo hoe : "Irahin’ilay Andriamanitry ny razanareo aho ho aty aminareo." Raha manontany ahy izy ireo hoe : "Iza no Anarany ?", dia inona no havaliko azy ireo ?” Hoy Andriamanitra tamin’i Môizy : “Izaho no Ilay misy.” Ary hoy Izy : “Izao no havalinao ny zanak’i Israely : "Ilay Misy" no naniraka ahy ho aty aminareo. (...) Fa izany no anarako mandrakizay, araka izany no iantsoana ahy hatramin’ny taranaka fara aman-dimby” (Eks 3,13-15).