Laharana 309 amin’ny Katesizy

Raha Andriamanitra  ilay Ray Mahefa ny zavatra rehetra, Mpahary an’izao tontolo izao milamina sy tsara, no mikarakara ny zavaboariny rehetra, nahoana no misy ny ratsy ? Amin’izany fanontaniana izany, izay sady manery no tsy azo ihodivirana, sady mampijaly no mifono mistery, dia tsy misy valin-teny maika, ampy amaliana azy. Ny fitambaram-pinoan’ny kristianina no mitambatra ho valin’io fanontaniana io : ny hatsaran’ny voary, ny antambon’ny fahotana, ny fitiavan’Andriamanitra  mahari-pery izay tonga mialohan’ny olombelona amin’ny alalan’ny fanekem-pihavanany, amin’ny alalan’ny Fahatongavan’ny Zanany ho nofo mitondra fanavotana, amin’ny alalan’ny fanomezana ny Fanahy Masina, amin’ny alalan’ny famoriana ny Fiangonana, amin’ny alalan’ny herin’ny sakramenta, amin’ny alalan’ny antso ho amin’ny fiainana mahasambatra, izay amin’izany ny voary manam-pahafahana no asaina mialoha hankatò, nefa afaka mandà koa izy ireo,  noho ny mistery mampihoron-koditra. Tsy misy tsirin-kevitra avy amin’ny hafatra kristianina izay tsy mitondra ampahana valin-teny amin’ny fanontaniana momba ny ratsy.