Numerus 156 Catechismi

Motivum credendi id non est quod veritates revelatae lumini nostrae rationis naturalis tamquam verae et intelligibiles appareant. Credimus « propter auctoritatem Ipsius Dei revelantis, qui nec falli nec fallere potest ». ¹⁶⁰ « Ut nihilominus fidei nostrae "obsequium rationi consentaneum" esset, voluit Deus cum internis Spiritus Sancti auxiliis externa iungi Revelationis Suae argumenta ». ¹⁶¹ Sic Christi et sanctorum miracula, ¹⁶² prophetiae, Ecclesiae propagatio et sanctitas, eius fecunditas et stabilitas « divinae Revelationis signa sunt certissima et omnium intelligentiae accommodata », ¹⁶³ credibilitatis motiva quae ostendunt quod « fidei assensus nequaquam sit motus animi caecus ». ¹⁶⁴